Organisering og ansvar
UNESCO-konvensjonen om vern av verdas kultur- og naturarv frå 1972 gir statar som sluttar seg til konvensjonen ansvar for å ta vare på eigne verdsarvverdiar. Forvaltning og ivaretaking av Vestnorsk fjordlandskap er organisert gjennom eit samarbeid mellom nasjonale, regionale og lokale styresmakter.
Norsk forvaltning av Vestnorsk fjordlandskap
Merk at verdsarv er ein status tildelt av UNESCO,. Verdsarvstatusen endrar ikkje på formell mynde eller ansvarsfordeling etter lov. Vestnorsk fjordlandskap blir elles forvalta gjennom nasjonalt lovverk og etablerte forvaltningssystem. Verneområda dekkjer store delar av verdsarvområdet og verneområdestyra skal ta vare på natur- og kulturverdiar etter lov.
Ivaretaking av verdsarvområdet er dermed eit felles ansvar mellom:
- statlege styresmakter
- fylkeskommunar (2)
- kommunar (6)
- verneområdestyre (2)
- fagmynde
- verdsarvkoordinatorar og -stiftingar i kvart av delområda
Verdsarvrådet er eit råd for samordning mellom desse partane.
Fordeling av ansvar og mynde etter norsk lov i Vestnorsk fjordlandskap
| Nivå | Aktør | Lovgrunnlag / ansvarsområde |
|---|---|---|
| Lokalt | Kommunane (Aurland, Vik, Lærdal, Voss, Stranda, Fjord) | Mynde etter plan og bygningslova - jordlova, skogbrukslova, motorferdsellova, naturmangfaldlova. Lokal arealforvaltning, handsaming av tiltak, tilskot og planarbeid. |
| Lokale verneområdestyre | Naturmangfaldlova. Forvaltningsmynde for landskapsvernområde og nasjonalparkar etter delegasjon frå statleg nivå. | |
| Regionalt | Fylkeskommunane (Vestland, Møre og Romsdal) | Kulturminnelova: Forvaltning av automatisk freda kulturminne og kulturmiljøoppgåver. Plan- og bygningslova: Regional planmynde, utarbeiding og vedtak av regionale planar. Friluftslivslova: Regional rolle i friluftslivstilrettelegging. |
| Statsforvaltaren (Vestland, Møre og Romsdal) | Naturmangfaldlova, kulturminnelova, jordlova, skogbrukslova. Forvaltningsmynde i naturreservat, kontroll og oppfølging av miljø- og landbrukslovgiving. Personalansvar for verneområdeforvaltar. | |
| Kystverket, regionkontor | Hamne- og farvasslova. Mynde for tiltak i sjø og farleier regionalt. | |
| Fiskeridirektoratet, regionkontor | Havressurslova, akvakulturlova. Forvaltar fiskeri og akvakultur på regionalt nivå. | |
| Nasjonalt | Klima- og miljødepartementet (KLD) | Naturmangfaldlova, verdsarvkonvensjonen. Fastset verneforskrifter, gjer vedtak om vern, overordna ansvar for naturforvaltning. |
| Miljødirektoratet | Naturmangfaldlova. Fagleg styring av verneområde, godkjenning av forvaltningsplanar, dispensasjonar, oppfølging av verneforskrifter. | |
| Statens naturoppsyn (SNO) | Heimel i Naturoppsynslova. Kontroll, tilsyn, rettleiing og skjøtsel på oppdrag frå verneområdeforvlaltninga. Underlagt Miljødirektoratet. | |
| Riksantikvaren | Kulturminnelova. Freding, dispensasjonar, tilsyn med kulturminne og kulturmiljø. | |
| Landbruks- og matdepartementet (LMD) | Skogbrukslova, jordlova, konsesjonslova. Overordna ansvar for jord- og skogbrukspolitikk. | |
| Landbruksdirektoratet | Same lovverk som LMD. Forvaltning av tilskot, kontroll, rådgjeving innan landbruk og skogbruk. | |
| Nærings- og fiskeridepartementet (NFD) | Havressurslova, akvakulturlova. Overordna ansvar for marine ressursar og kystforvaltning. | |
| Fiskeridirektoratet | Same lovverk som NFD. Regulering av fiskeri og akvakultur. | |
| Kystverket | Hamne- og farvasslova. Forvaltning av farleier, hamner og tiltak i sjø. | |
| Sjøfartsdirektoratet | Skipssikkerheitslova og anna maritimt lovverk. Tilsyn med skip, registrering av fartøy og sertifisering av sjøfolk |
Oversikt over forvaltningsnivå, aktørar og lovgrunnlag/ansvarsområde. Lista er ikkje uttømmande.
Verdsarvkoordinatorane og -stiftingane
Verdsarvkoordinatorane i Nærøyfjordområdet og Geirangerfjordområdet har eit nasjonalt forankra mandat til å følgje opp og ta vare på verdiane som ligg til grunn for verdsarvstatusen. Rolla inneber likevel ikkje formell myndigheit etter lovverk, og arbeidet må difor skje gjennom samarbeid, koordinering og påverknad overfor relevante aktørar. Verdsarvkoordinator og tilhøyrande administrasjon skal syte for rapportering, gi råd og elles varsle dersom det er bekymring om utviklinga for Vestnorsk fjordlandskap.
Verdsarvkoordinatorane står for dagleg leiing av Stiftinga Nærøyfjorden Verdsarvpark og Stiftinga Geirangerfjorden Verdsarv som er lokale ideelle stiftingar med eigne styre i kvart delområde. Stiftingane er oppretta av verdsarvkommunane og verdsarvfylka for å ivareta arbeidet med vern, kunnskapsformidling, lokalt samarbeid og berekraftig utvikling i Vestnorsk fjordlandskap. Begge stiftingane samarbeider tett med forvaltning, næringsliv og forskingsmiljø, og har som felles mål å sikre ei berekraftig forvaltning av verdsarven der dei universelle verdiane vert tekne vare på samstundes som det vert lagt til rette for bruk og utvikling.
Verdsarvrådet - organisering av samarbeid
Verdsarvrådet skal samordne initiativ og aktivitetar som er viktige for å ta vare på verdsarven i dei to delområda. Verdsarvrådet har ikkje sjølvstendig mynde etter lov.
